Zopas verschenen: De Gruffalo in ’t Stellingwarfs!
AlgemeenEt wereldberoemde kienderboek The Gruffalo is now ok in et Stellingwarfs verschenen. De eerste uutgifte was al in 1999, in et Engels. Julia Donaldson schreef de oorspronkelike tekst, et tekenwark is van Axel Scheffler. D’r volgden hiel vule vertaelings, in grote taelen zoas Duuts, Chinees, Russisch en Maori, mar ok in regionaole taelen en streektaelen, zoas in ’t Nedersaksische Twents, Grunnings, Aachterhoeks, Veluws en Drents.
Zovule vertaelings, dat kan as een boek biezunder is. De Gruffalo staot dan ok bekend as een klassiek kienderboek. Niet allienig kiender, zeg mar van 3 tot 7 jaor wo’n d’r al veurlezende deur mitsleept, mar grote meensken liekegoed. Biezunder genoeg kuj’ je mit de Gruffalo ok in de bosrieke omgeving van Stellingwarf vulen. Dat komt deur et beeldwark mit bos en aandere elementen in de netuur. Mar liekegoed deur Moes, Slange, Oele en Vos, slim herkenbere feguren, ieder in zien eigen rolle. En misschien ok wel deur de Gruffalo zels, de indrokwekkende tegenspeulder en bosbewoner uut de fantesiewereld! Of… is de Gruffalo juust gien fantesie? Daor dri’jt et now krek omme, in de keunstige verhaellijn van et boek.
Kiender en veurlezers wo’n dus makkelik mitsleept en butendat is De Gruffalo in ’t Stellingwarfs een mooi middel veur de overdracht van de meer as twaelfhonderd jaor oolde Stellingwarver tael an ni’je generaosies. Et is mar liefst de 115de vertaeling. Die is van Henk Bloemhoff uut Oosterwoolde. Uutgever veur Nederlaand is de Stellingwarver Schrieversronte in Berkoop. Te bestellen op info@stellingwarfs.nl. Pries: 10 euro.
© Ofbelinge: Macmillan Children’s Books, Londen
